وێڕای سوپاس و دەستخۆشی ، ئەنجومەنی کۆلێجی پەروەردەی زانکۆی سلێمانی ، ستایشی ھەڵوێستی لە خۆ بوردوانەی سەرجەم مامۆستایان و فەرمانبەرانی کۆلێج دەکات. لێرەوە ڕایدەگەیەنین کە سەرەڕای ئەوەی بە گشتی دەوام ڕاگیراوە لە دام و دەزگاکاندا بەھۆی دواکەوتنی مووچە و ئەو قەیرانە ئابوورییە ناڕەوایەی ڕووی ھاوڵاتیانی گرتۆتەوە، بەڵام دەوامی کۆلێجی پەروەردەی زانکۆی سلێمانی بەردەوام بووە ئەگەر چی دوای ماوەی نزیکی دوو مانگ ئینجا خشتەی وەرگرتنی مووچە لە میدیاکان بڵاو کرایەوە . ھۆکاری ئەمەش دەگەڕێتەوە بۆ لە خۆبووردەیی و خۆڕاگری فەرمانبەران و مامۆستایان ، کە تەنھا ھەڵقووڵاوی کانگای خۆشەویستیانە بۆ کۆلێجەکەیان بێ گوێدانە ھیچ ئایدۆلۆجیایەکی کەسی و حزبی. وە ھەروەھا جێی خۆیەتی ئاماژە بدرێت بە ھەڵوێستی خوێندکاران کە تەنانەت دوای داخستنی بەشەناوخۆییەکانیش ھەوڵی پێداگری و مانەوەیان دەدا بۆ بەردەوام بوون لە پڕۆسەی خوێندنیان ئەمەش نیشانەی ئاست بەرزی و تێگەشتووییانە لە مەترسیەکانی کاریگەری وەستاندنی خوێندن بۆ سەر ئاستی زانستیان. ئەگەر چی ئەمانیش وەک چینی گەنجان زەرەرمەندن لەو دۆخە نالەبارەی کە ھەرێمەکەمان پێوەی دەناڵێت .
ئەمە لە کاتێکدایە کە تائێستا خوێندنی (خوێندنی باڵا : دبلۆمی باڵا – ماستەر – دکتۆرا ) بەردەوامە وەلە ھەمان کاتدا پڕۆسەی ڕاھێنانی خوێندکارانی قۆناغی چوارەمیش بەردەوامە لەو خوێندنگایانەی سنوری شاری سلێمانی کە بایکۆتیان نەکردوە ، بۆ ئەو خوێندکارانەی کە ماڵیان لە ناو شارە یان کێشەی مانەوەی خۆیان چارەسەر کردوە، کەلە لایەن مامۆستایانی کۆلێجەوە ڕۆژانە ھەڵسەنگاندنیان بۆ دەکرێت .
ھەروەھا بەڕێز ڕاگری کۆلێج (پ.ی.د ھەناو حسن محمد خان ) ، سوپاس و پێزانینی خۆی ئاڕاستەی سەرجەم خوێندکاران و مامۆستایان و فەرمامبەرانی کۆلێج دەکات و ھیوای ھەمیشە سەربەرزی و سەرفرازیان بۆ دەخوازێت ، وە لەم میمبەرەوە بە سەرۆکایەتی زانکۆی ڕادەگەیەنێت کە فەرمامبەران و مامۆستایانی کۆلێجی پەروەردە شایەنی باشترین خەڵات و نازناوی مامۆستا و فەرمامبەرانی نمونەیی زانکۆی دایکن ، وە خوێندکارانیشمان شایەنی پشتیوانی و گرنگی پێدانی زیاترن .
لە کۆتاییدا بەھیواین بۆ گەڕانەوەی بارودۆخی ئاسایی و سەرکەوتنی زیاتر بۆ زانکۆ و کۆلێجمان .